ໃນເດືອນມັງກອນ 2022 ທີ່ຜ່ານມາ ສະມາຄົມສົ່ງເສີມການອະນຸລັກສິລະປະວັນນະຄະດີ ຫຼື ສອສວ ໄດ້ຮັບການສະໜັບສະໜຸນ ພິມປຶ້ມ “ສິນໄຊ” ຈໍານວນ 1,500 ເຫຼັ້ມ ຈາກ KOFICE ພາຍໃຕ້ໂຄງການ CPI ສະໜັບສະໜຸນໂຄງການວັດທະນະທຳ 2022 (CPI Support Cultural Program 2022), ປຶ້ມສິນໄຊ ໄດ້ລິດຈະນາ ຈາກບົດກະວີ ມາເປັນພາສາລາວ ອ່ານງ່າຍ ຕັ້ງແຕ່ປີ 1991, ຖືກພິມຄືນໃໝ່ຄັ້ງທີ 7 ເປັນພາສາລາວ ໂດຍໂຮງພິມ Wantreez Music ຈາກເກົາຫລີໃຕ້ ເຊິ່ງມາຮອດ ນະຄອນຫຼວງວຽງຈັນ ໃນວັນທີ 10 ເດືອນ ມິຖຸນາ 2022.

ເພື່ອເປັນການສົ່ງເສີມການອ່ານ ໃຫ້ເດັກນ້ອຍນັກຮຽນໃນປະເທດລາວ ສະມາຄົມ ສອສວ ຈຶ່ງໄດ້ຈັດກິດຈະກຳສົ່ງເສີມການອ່ານຂຶ້ນ ເພື່ອແນໃສ່ສະໜອງປຶ້ມອ່ານໃຫ້ນັກຮຽນ ທາງສະມາຄົມ ໄດ້ແຈກຢາຍປຶ້ມ “ສິນໄຊ” ເຊິ່ງການແຈກຢາຍ ສ່ວນໃຫຍ່ເປັນໄປຕາມການຮ້ອງຂໍ ໂດຍຜ່ານຄໍາຮ້ອງສະໝັກ ອອນໄລນ໌ ແລະ ອອຟໄລນ໌. ຄາດໝາຍເພື່ອແຈກຢາຍປຶ້ມ ສູ່ 210 ໂຮງຮຽນ (50 ໂຮງຮຽນ ໃນນະຄອນຫຼວງວຽງຈັນ ແລະ 160 ໂຮງຮຽນຢູ່ຕ່າງແຂວງ). ນອກຈາກນັ້ນ ທາງສະມາຄົມ ຍັງໄດ້ຈັດກິດຈະກໍາສົ່ງເສີມການອ່ານ ຢູ່ 4 ໂຮງຮຽນທີ່ນະຄອນຫຼວງວຽງຈັນ ຄື: ໂຮງຮຽນປະຖົມສົມບູນ ທົ່ງກາງ, ໂຮງຮຽນປະຖົມສົມບູນ ສີເກີດ, ໂຮງຮຽນປະຖົມສົົມບູນ ດົງໂພສີ ແລະ ໂຮງຮຽນ ປະຖົມສົມບູນ ໜອງໜ້ຽວ ເພື່ອເປັນສ່ວນໜຶ່ງຂອງໂຄງການສົ່ງເສີມການອ່ານ ແລະສົ່ງເສີມເດັກນ້ອຍໃຫ້ຫັນມາອ່ານປຶ້ມຫຼາຍຂຶ້ນ.